شراء قطع غيار السيارات والاكسسوارات عن طريق النت

[M.H.SH]

سلام عليكم شباب


بما اني راح اشتري همر h3 قريبا وانضم معكم .. بس دعواتكم

فحبيت افتح محل نقاش

الحين راعين الغرابي ومحلات الزينه وماتهون الوكالات يبيعون علينا قطع بأسعار نار


بالنهايه راس مالها قطعه بلاستيك لا راحت ولا جت
ورا ما نطلب من النت اكسسوارات للسياره بشكل عام وناس كثير يشترون القطع من برا على فكره


حتى سستم الصوت اسعارها بالرياض غاليه بالحيل
لو قارنتها باسعار جده فما بالك باسعار برا ؟

الناس بالرياض يدفعون ولا همهم لو تلاحضون


انا اقول لو عجبتنا قطعه نطلبها كلنا سوا من النت وانا اعرف واحد عليه الشراء والتوصيل وكل شي

بعموله رمزيه ولا تهون ارامكس بعد



تحياتي شباب ,,,

[Abo Sa3aD]

فكرة روعة .... وياليت تطلب من خويك يزودنا بالمواقع التي يثق بها وتكون مختصه بهمر عشان اذا حابين نطلب منها قطع غيار ولا اكسسوارات.

[hummerh3]

بصراحة انا مع الفكرة جملة وتفصيلا

اكسسوارات وقطع غيار وكل مايهم سيارات الهمر

[M.H.SH]

هلابك ابو سعد
وحيالله الجميع

هذا رابط موقع آي باي خاص باكسسوارات h3


http://motors.shop.ebay.com/_Car-Truck-Parts-Accessories__?_sacat=6030&_dmpt=Motors_Car_Truck_P arts_Accessories&_m2home=1&Make=Hummer&Model=H3&_m yi=&_rkw=&Make=Hummer&Model=H3&_myi=&_rkw=



وهذا خاص باكسسوارات h2

http://motors.shop.ebay.com/_Car-Truck-Parts-Accessories__?_sacat=6030&_dmpt=Motors_Car_Truck_P arts_Accessories&_m2home=1&Make=Hummer&Model=H2&_m yi=&_rkw=



على فكره فيه مواقع اخرى بس مافيه زي آي باي
اي شي يخطر على بالك بتلاقيهـ بذا الموقع

[Abo Sa3aD]

http://www.hummerstuff.com

عندك هذا موقع رسمي من همر أمريكا .. يا ليت تشوفه مع خويك يا وليد.

[M.H.SH]

اخوي ابو سعد اللي تشتري عن طريقه مو خويي مؤسسه بالرياض

تشتري لك من الانترنت بعموله رمزيه
وفيه اشخاص كثيرين نظامهم مثل هالمؤسسه

هل يسمح بوضع رابط منتدى ؟

[M.3.D]

يعيطك العافيه يا وليد مشكور على الموضوع بس ياليت تذكر موقع الشركه وكيف طريقه التواصل معهم

موفق ولك مني اجمل تحيه

[Fahad]

صراحه فكرهـ روعه ,, وممتازهـ ,,

بدخل الموقع وبشوف القطع المتوفرهـ والاكسسوارات ,,

[F.B.S]

والله فكرة ممتازه و الكثير مو قاعد يستفيد من هالشي
للمعلومية انا شاري الهمر من EBAY
بنفسي بدون تدخل اي شخص و لا عمولات ولا شي

المسأله اكثر من سهلة ياوليد حتى انت ماراح تحتاج هالمؤسسة :

1- تحتاج صندوق بريد امريكي من ارامكس بمبلغ رمزي مايتعدى 200 ريال ويكون لك مدى الحياه
2 - بعد تنفيذ الخطوة الأولى انتهت جميع مشاكلك .. وتقدر تتسوق من امريكا وكأنك في أمريكا ..
3- اذا اعجبتك اي قطعه في اي موقع راسلهم و قل لهم انك راح تدفع اما عن طريق حوالة بنكية او عن طريق شركة Western Union وزودهم بعنوانك البريدي .. طبعا هنا لا زم تنتبه من المواقع المشبوهة و اشتري من مواقع رسمية وموثوقه .( مواقع شركات وليس أفراد )
4 - بالنسبة لـ Ebay لازم تسجل فيه مجاناً .. و بعدين تصير تبحث عن القطعه الي تبي و تزايد عليها او تراسل صاحب القطعه عن طريق الرسائل و تخبره انه انت في السعوديه و عندك عنوان بريدي امريكي باسمك وتفاهم معاه على طريقة للدفع ..
5- كيف تعرف ان البائع موثوق في Ebay ?? عن طريق ال Rating او التقييم .. راح تلقى عند اسم كل بائع تعليقات و ايقونات مثل Power Seller .. هاذي التعليقات من ناس مثلك اشترو من هذا البائع من قبل .. انت ادخل واقراها عشان تتطمن .. طبعا لايهمونك الي ال Rating تبعهم 10 او 20 .. لاتشتري الا من ناس تعدو المئات .. و تأكد بنفسك ..
6 - اشرح لكم الموضوع بكل بساطه :

( بحث عن القطعه من مصدر موثوق ) بعدين ( السؤال عن السعر النهائي مع التوصيل لعنوانك البريدي المقدم من ارامكس و السؤال عن وزن القطعه وهالشي مهم ) بعدين (تسأل ارامكس كم راح يكلف تمرير بضاعتك من عنوانك الامريكي الى الرياض حسب الوزن ) بعدين بعد ما تحسب امورك .. (اتفق على طريقه دفع بينك وبين البائع ) .. بعدين تتبع شحنتك عن طريق ارامكس لين توصلك وادفع لهم مبلغ التوصيل من امريكا والمتفق عليه سابقا ..


ادري اني طولت في الشرح لكن هذا للفائده ..
واللي يبي يريح راسه ويشتري وقته يلجأ للمؤسسه خاصة ان عمولتها بسيطه على كلام وليد .. لكن طرحت الطريقه للمعرفة والالمام والفائده العامه ..
و اشكرك وليد على اثراء هالفكره ..

[Abo Sa3aD]

ما شاء الله عليك ... سؤال كم كلفك شحن الهمر ؟؟ او يا ليت تشرح لنا الخطوات اللي مريت فيها .. من اختيارك للسيارة لغاية وصولها عندك ..

[F.B.S]

ما شاء الله عليك ... سؤال كم كلفك شحن الهمر ؟؟ او يا ليت تشرح لنا الخطوات اللي مريت فيها .. من اختيارك للسيارة لغاية وصولها عندك ..

طال عمرك المسأله بسيطه كل اللي يبغالها قدرة على التواصل و صبر و بنفس الوقت حذر شديد .

اول شي سجلت في Ebay ودورت على همرات سعرها يكون مناسب لميزانيتي و حطيت في بالي ان اي همر اشوفه ازود عليه 3000 دولار حد اقصى لقيمة التوصيل لين جده .

بديت ادور في الهمرات و احسب الاسعار والممشى طبعا اخذت فترة اسبوعين كل يوم ادخل واشوف الهمرات المعروضة واقارن الاسعار .. و اشوف السعر المتوسط و اعرف الممشى المتوسط . لين تكونت عندي فكره عن السعر العادل للهمر عشان ما ادفع فلوس زياده عن اللزوم .. طبعا فوق هذا كله قارنت السعر مع التوصيل بالهمرات المعروضه في المعارض .. واكتشفت اني انا الكسبان بكل تأكيد ..

حطيت عيني على 3-4 همرات .. طبعا اوقات المزايده عليها كانت متفرقه .. فأول شي بديت بالهمر الي بينتهي عليه المزاد مبكر .. و زايدت عليه و لا صار من نصيبي لانه تعدى السعر الي في بالي ..
والثاني والثالث نفس الحكايه .. لين الهمر الاخير زايدت عليه و رسى علي المزاد ..

طبعا نقطة مهمه :

قبل لا ابدا في المزايده اتصلت على الوكالة الي عارضين السياره واخذت معلومات تفصيليه عن اخر الصيانات الي انعملت للسياره .. و طبعا انا السياره كنت شاريها من موزع معتمد لهمر .. فعشان كذا مرتاح .. وارسل لي صور لآخر فحص وصيانه وكان واضح فيها التاريخ وكل التفاصيل
طبعا انا الي مخليني اتطمن لهالموضوع ان امريكا بلد مايضيع حقك فيها واقول هالشي من واقع تجارب مو تجربه ..
قد صار للوالد مشكله مع شركه و على شي تافه جدا وقدم اوراقه للسفاره هنا و تجاوبوا معنا وانحلت المشكله و اخذ الوالد حقه .. طبعا الله لا يجيب هالمشاكل بس حبيت اطمنكم ..

طبعا فوق هذا كله موقع Ebay يوضح لك تقييم البائع .. فيه معلومات عن تعاملات البائع السابقه مع تعليقات عليها .. طبعا هالشي مهم تلقي عليه نظره قبل لا تتورط ببائع او وكيل تعيس .. لازم يكون عنده Positive feedback


و ارسلو لي صور صراحه كثير جداً على ايميلي تقريبا لكل جزء في السياره و ارتحت للتعامل معهم .. وبديت في المزايده ..

زايدت حتى انتهى المزاد بأقل من السعر الي هم يبونه .. او يسمونه Reserve price
و طبعا في هالحاله عرضو علي سعر قريب من سومتي و وافقت ..

* مدة المزايده اخذت مني تقريبا اسبوع ..

*مدة التحويل اخذت اسبوع ( من بنك الى بنك ) طبعا انتبه تحول مبلغ لشخص .. لازم تحول مبلغ لحساب الوكيل نفسه واحرص بأن يكون نفس اسم الحساب هو نفس اسم الوكيل عشان ماتدري يمكن احد عاملي الشركه يبي ينصب عليك ..

* اجراءات نقل الملكية والتصدير و و اجراءات حجز مكان للسياره في باخره اخذت اسبوع ..

* بعدها راح يرسل لك الوكيل الاستماره .. وفيها اسمك وكل شي يحتاج تعبي فيها التوقيع و بعض الخانات ..

* بعدها بيرسل لك متعهد الشحن ( شركة نقل غير الوكيل ) بوليصة الشحن ..

بعدها عاد لما توصل لك الاوراق احفظها عندك ..

اخذت السياره 18 يوم في البحر

بعدين اول ما وصلت طبعا كان عندي رقم تتبع للباخره عرفت فيه انها وصلت
بعدها ارسلت الاوراق لمكتب تخليص جمركي في جده واحد اعرفه خلص امور السياره ..

اخذ تخليص السياره مع نقلها للرياض اسبوع تقريبا .. وفي الرياض طلعت لوحات . .


المخلص الجمركي اخذ مني 5000 و كسور شاملة الجمرك ونقل السياره للرياض بسطحه خاصه ..

الجمرك كان 3000 و شويات .. ماتوقعت كذا ..

والنقل من امريكا اخذ مني بالظبط 3000 دولار وهو عباره عن نقل السياره من ولاية الوكاله الى ولاية اللي فيها الميناء .. + نقل السياره من الميناء الامريكي لميناء جده الاسلامي ..



بصراحه كانت تجربة ممتعه وسهلة للغايه وفرت علي مبلغ مو بسيط ..
لكن ما اخفيكم انه بغت تطلع لي قرون من كثر ما انتظر ههههههههههههههه والدقيقه كنها شهر ..


اي خدمات انا حاضر .. واذا ودكم تفصلون الرد هذا في موضوع مستقل انا حاضر بعد ...

[Abo Sa3aD]

والله يا ليت ياخوي تكتب هالاشياء بموضوع مستقل تحت قسم البيع والشراء ... لانه صراحة مهم واغلبنا يجهل هالشغله ... وشرحك كافي ووافي ما ناقصك الا باور بوينت بس ... الله يعطيك العافية

[hummerh3]

ماشاء طلعت المواهب

[M.H.SH]

ناس كثير بدوا يشترون من النت حتى قطع السيارات واكسسوارتها

فعلاً فيه توفير بشكل

والسيارات بعد موقع ebay مو بهين ابد


واي احد عنده مواقع قطع واكسسوارات يحطها الله لا يهينه



,,,

[F.B.S]

راح احطه بموضوع مستقل انشالله مدعم بالصور ..